Comun di Gonârs

Vrhnika, citât zimulade

Ricercje svelte


< vai al contenuto centrale




Il tuo percorso: Tu ti cjatis chi: Comun di Gonârs > Informazions > Storie > Preistorie e protostorie

Preistorie e protostorie

Rescj de ete neolitiche. Te prime file, il secont di sx e te seconde file il secont di sx a son stâts cjatâts tai cjamps tra Gonârs e Porpêt. Font: Museus Civics di Udin

I rescj plui antîcs che a dimostrin la presince dal om te Basse Furlane a van indaûr al Mesolitic: a son piçui imprescj di silice sclesade doprâts par fâ lis pontis des frecis par lâ a cjace. Chescj reperts a dimostrin che tra il 8000 e il 7000 prin di Crist te basse planure furlane a jerin piçui grups di nomats che a vivevin cjaçant i grancj mamifars dal bosc (cierfs, cenglârs, e v.i.) e cjolint sù plantis salvadiis. In chest periodi la planure furlane e veve di jessi cuvierte di un vast bosc di rôi, frassins, faiârs e a vevin di jessi tancj flums, risultivis e palûts. Plui tart, tor dal 5000 prin di Crist, cuant che il rapuart dal om cul ambient e la maniere di sfrutâ il teritori a jerin cambiâts, cheste zone e fo colonizade des primis comunitâts di agricultôrs e arlevadôrs dal Neolitic che a cjaparin la planure tirant jù i arbui, brusant grancj tocs di bosc e movintsi in maniere periodiche par cirî tieris gnovis. Duncje la presince e l'impat dal om dal Neolitic in cheste zone no son stâts continuatîfs, come che e dimostre la diversitât dai sîts archeologjics de zone.

Par ce che al rivuarde i periodis che a son vignûts dopo, la Ete dal Ram e la Ete dal Bronç antîc (fin ai prins secui dal II mileni prin di Crist), no son testemoneancis archeologjichis impuartantis. Tal rest de Italie setentrionâl, invezit, la Ete dal Bronç antîc e je documentade une vore ben: e je la epoche des palafitis, ven a stâi dai grancj vilaçs costruîts su struturis di pâi; lis comunitâts a son insediadis in maniere stabile intun teritori precîs e a vivin cu la agriculture e cul arlevament dai ovins e no dome cu la cjace e cu la racuelte dai prodots spontanis. Cheste aree e à duncje diferencis rispiet ae Italie dal nord: no risulte la presince di palafitis e ancje se a esistin ogjets di bronç, simii a chei che a son in Italie setentrionâl, si cjatin ancje ogjets di crep che invezit a mostrin l'inflùs de culture balcaniche de Danau.

A son invezit documentazions di insediaments e di vilaçs tacant de Ete dal Bronç di Mieç (1700 prin di Crist cirche). Al è di chest periodi l'insediament di Porpêt, jevât suntune culinute e parât di elements naturâi (il flum Cuar a nord e un grant palût di chês altris bandis) e di intervents umans (une dople spaltade ator ator e un teraplen). Cun di plui chest insediament al è ancje un impuartant centri di produzion metalurgjiche e forsit propite par chest è l'unic che, dopo dal svilup di vilaçs de Ete dal Bronç di Mieç, al resist ae crisi che e à cjapât dentri buine part de Italie setentrionâl: une crisi che la planure furlane no jere rivade adore di lassâ indaûr fin al moment de colonizazion romane.

Lis testemoneancis che a rivuardin la Ete dal Fier (tacant dal secul VIII prin di Crist) a son scjarsis: i pôcs sîts (Porpêt, Palaçûl, Cjarlins) a son dongje dai flums principâi e avonde dongje dal mâr. Duncje da râr si è vignûts a vivi in planure, ma i reperts a fasaressin pensâ a une strategjie di insediament diferente di chê de Ete dal Bronç di Mieç e Gnûf: no plui un sisteme di vilaçs logâts dongje dai flums ma pôcs insediaments che a controlin une grande part di teritori, forsit lant daûr di une jerarchie politiche e militâr precise.

Riferiments bibliografics

Il Friuli prima del Friuli : preistoria friulana, uomini e siti / Andrea Pessina, Gianpaolo Carbonetto. - Gorizia : Vittorelli, 1998

Preistoria nell'udinese : testimonianze di cultura materiale / testi di Francesca Bressan, Alfredo Riedel, Aldo Candussio. - Udine : Missio, 1981

Progetto Parco intercomunale del fiume Corno : relazione d’analisi : parte seconda / Provincia di Udine, Comune di Gonars, Comune di Porpetto, Comune di San Giorgio di Nogaro. – [Provincia di Udine], 2002

Storia del Friuli dall’età del bronzo all’annessione all’Italia / Amelio Tagliaferri. – p. 31-65
In: Bassa friulana : tre secoli di bonifica / Amelio Tagliaferri ... [et al.]. - Udine : Consorzio di Bonifica Bassa friulana, 1990