Comun di Gonârs

Vrhnika, citât zimulade

Ricercje svelte


< vai al contenuto centrale




Zornade dal Volontariât - 20.11.2011

 

La “Zornade dal volontariât”, e je stade istituide ai 9 di Mai di trê agns indaûr in dute Europe.

I volontaris a judin cui che al è vecjo e bessôl, a traspuartin i malâts tai ospedâi, tai parcs a fasin lis vuardis ecologjichis, a unissin la comunitât e a rinfuarcin i rapuarts tra i citadins a traviers da la agregazion, il bal, la musiche, lis cerimoniis civichis e di ricuart, la ativitât religjose, la gjinastiche e il sport.

Al è clâr che no si à di dismenteâ cui che si ocupe di nemâi, di culture o che al opare dentri ta la Protezion civîl.

Sielzi di donâ il propri timp par judâ chei altris al vûl dî cirî il dialic, refudâ la indiference, fâ sù une coletivitât fondade su la sensibilitât tai confronts des esigjencis dai plui debii, di cui che nol à i mieçs, di cui che nol à vôs.

La ativitât direte dai volontaris no je a pro da la Aministrazion Comunâl e nancje pal interès o pal lustri tai confronts des associazions di apartignince ma e met la sô rason di esisti dome te ufierte di jutori e ta la dimostrazion di solidarietât viers di chei altris.

Parcè che - o vin di visâsi - che chei altris o sin nô.

Il Faraon Amenemhat II tal 2.300 p.d.C. al scriveve: “Visaitsi di chê altre rive dal flum, dulà che une dì o sarês misurâts daûr dal pês dal vuestri cûr”.