Comun di Gonârs

Vrhnika, citât zimulade

Ricercje svelte


< vai al contenuto centrale




Borsis di studi "Chiara e Federico"

 

Ai 7.5.12 aes 10.30 al è stât l’apontament tradizionâl ta la palestre di base di Gonârs dai students dal Istitût comprensîf di Gonârs, Bicinins e Bagnarie pe Fieste da la Musiche.

A jerin presints cirche 400 fantats des ultimis classis des scuelis primariis e des scuelis secondariis, i insegnants e un grum di gjenitôrs.

A son stâts presentâts tocs di musiche classiche e moderne fats di soliscj vocâi e virtuôs da la ghitare, saxofon  e pianoforte cun l’acompagnament dal flaut di un grum di coleghis.

Par la ocasion a son stâts premiâts i elaborâts da la borse di studi dedicade a Chiara e Federico, i fruts di Gonârs muarts tal tragjic incident da la Napoleoniche di doi agns indaûr, adun cu la mari.

Il Comun di Gonârs cul supuart da la fondazion CRUP al à bandît une borse di studi di 1000 euros al an par 3 agns di assegnâ ai fruts des mediis par la produzion di doi elaborâts, un su la sigurece stradâl e un di narative libare, par vie che la arleve Chiara Candotto e jere apassionade scritore di contis.

A son stâts premiâts dal Sindic Marino del Frate e dal responsabil dal Istitût comprensîf prof. Gilberto Della Negra par la sezion “conte a teme libar”: elaborât di test: 1n puest Linda Sclauzero 1eC , 2t puest Alex Masini 1eA, 3ç Lia Giorgione 1eB.

Par la sezion “sigurece stradâl”: elaborât grafic: 1n puest Samuele Vicedomini 3eA , 2t puest Giulia Penz 3ec, 3ç puest Eva Strizzolo 3eb.

Lis classis tiercis des mediis a dopraran il premi par comprâ un casc pal motorin, lis classis primis des mediis a dopraran il premi par comprâ libris di tescj.

Daspò da la l’introduzion, i ringraciaments di etichete e i compliments dal dirigjent scolastic, il Sindic Marino Del Frate al à comunicât che pal prossim an scolastic il Consei comunâl al à previodût un stanziament par permeti che in dutis lis aulis des scuelis mediis di Gonârs e sedi disponibile une lavagne multimediâl par un insegnament plui moderni e inzornât e par introdusi i fruts a lis aplicazions pratichis da la informatiche.