Cerimoniis dai 4 di Novembar

 

A son stadis fatis tal cjâf lûc e tes frazions lis cerimoniis tradizionâls dai 4 di Novembar organizadis da la Aministrazion comunâl in colaborazion cu lis associazions di arme. A la fin des tradizionâls cerimoniis rievocativis il Sindic al à indreçât un ringraciament pal lavôr meritori di cure e onôr ai monuments ai muarts. Al è stât fat ancje un ringraciament par la organizazion des cerimoniis dal ricuart e pes iniziativis di tutele e difusion da la nestre culture furlane che tai secui e je stade leade in maniere strete ai fats di vuere e a lis fuarcis armadis. Chestis a àn convivût in maniere strete cu la popolazion, parcè che par agns a àn presidiât il confin orientâl, che al jere un dai plui cjalts da la Europe, dulà che e passave la cortine di fier. Al è stât visât il sens di gratitudin e di sigurece che lis monturis a infondevin adun cul solêf pe disparizion di chel gjenar di confin cu la jentrade in Europe. Al è stât memoreât il lôr lavôr a pro da la comunitât e duncje l’impegn no dome tal celebrâ, ma ancje tal fâ, tal promovi la agregazion comunitarie, tal dâ sosten al associazionisim, tal judâ cui che al à bisugne ta la cuotidianitât e tal intervignî tes situazions di pericul dongje da la Protezion Civîl. A la fin dal discors dal Sindic, la siore BIANCA PIU classe 1925 e à recitât la poesie che tal 1933, cuant che e veve 8 agns, su incaric dal so mestri elementâr e Podestât dal paîs ANGELO ZANELLO, e veve declamât propit su la stesse place, te zornade da la inaugurazion dal monument ai muarts. Il Sindic si è complimentât cun jê pe sô disponibilitât, pe sô etât puartade in maniere maraveose, pe sô vôs zovine e soredut pe sô memorie invidiabile.