Cerimonie ANPI a Antognan

 

 

Ai 27.05.2012 a Antognan al è stât fat il tradizionâl memoreament dal aniversari da la fusilazion dai partesans Benito Cavedale, Pietro Pallavicini, Arveno Marcuzzi, organizade da la ANPI cul patrocini dal Comun di Gonârs.

La cerimonie e je stade fate a la presince dai rapresentants da la Aministrazion comunâl e dai sindics di Palme, Bicinins, Bagnarie e Cjarlins e di Kristian Franzil, Assessôr a la Istruzion e Politichis pai Zovins, Sport e Timp Libar, Lenghis minoritariis, Dirits di citadinance dal Comun di Udin.

A son intervignûts il Sindic di Gonârs Marino del Frate, Irene Bolzon ricercjadore storiche e Federico Vincenti president ANPI provinciâl di Udin.

Un passaç dal discors dal Sindic:

“Jo o crôt duncje che la Istituzion Comunâl, che e rapresente ducj e vedi di dâ in maniere obligatorie vôs a ducj, tal rispiet totâl da la veretât storiche che aromai 65 agns indaûr e à stabilît di ce bande che a jerin lis resons e di ce bande che a jerin i tuarts. Il nestri President Napolitano si è impegnât di mût che i 25 di Avrîl e dutis lis cerimoniis che i son leadis a sedin di ducj i talians  di mût di rivâ a une conciliazion vere e definitive. Nô o condividin chest pinsîr vuê e pal avignî, no vin voie di peraulis di odi o di rancûr, ma o domandin sintiments di riconciliazion e di comprension”.