Fieste da la Republiche - Consegne da la Costituzion e dal Statût Regjonâl a chei che a finissin disevot agns

 

Come ogni an e je stade organizade la cerimonie istituzionâl da la consegne da la Costituzion taliane e dal Statût da la Regjon Friûl - Vignesie Julie a chei che a finissin disevot agns, par dâ il benvignût ai gnûfs citadins grancj visant i dirits e i dovês che la gnove cundizion e impon e par invidâ i fantats a la solidarietât e a un compuartament prudent su lis stradis.

Te palestre di base dal cjâf lûc denant di plui di cent e cincuante personis a son intervignûts i rapresentants des associazions dai donadôrs di sanc e da la protezion civîl, che a àn invidât i fantats a frecuentâ lis lôr sedis e a cjapâ part a lis lôr ativitâts, e il rapresentant da la Polizie di Stât l’Ispetôr cjâf Piraneo, che al à ricuardât la la pericolositât dai compuartaments inadeguâts da la vuide e rimarcant che l'incident stradâl al è la prime cause di muart dai zovins.

Il rapresentant di chei che a finissin disevot agns Erica Antonini al à esponût lis dificoltâts che la gjenerazion dai e cjate tal frontâ l’avignî e e à manifestât l'impegn a superâlis par mieç da la solidarietât e la colaborazion cun chei altris.

Il Conseîr regjonâl Colautti al à considerât che la cerimonie dai 2 di Jugn intindude come a Gonârs, tal dopli significât di moment civic istituzionâl e di invît a la solidarietât, e contribuìs a cimentâ il tiessût sociâl che tai moments di dificoltât economiche al riscje di molâsi.

Il Sindic al à concludût comunicant il dissens da la Aministrazion comunâl pes spesis da la parade dai 2 di Jugn a Rome, intun moment di particolâr soference pes popolazions da la Emilie e al à comunicât la decision di cjapâ sù il caric, adun cu la Zonte, cun fonts personâi, des spesis che a coventin pe manifestazion dai 2 di Jugn a Gonârs, zirant a pro dai taramotâts chel che prime al jere stât stanziât par la cerimonie stesse.