Zornadis di Sport & Solidarietât

Chest an tal Parc dai Teis, e in particolâr tal cjamp di Beach soccer a pene inaugurât, e je stade fate la seconde edizion des zornadis gonaresis di Sport e Solidarietât che e cjape dentri in competizions amatoriâls atletis abii e abii in mût diferent, cun chê di favorî une cressite umane e solidarie tra i zovins.

Ancje chest an la Fox Company Events, che e gjestìs par convenzion cul Comun la Istât tal Parc dai Teis, in plui di organizâ lis partidis, e à destinât la cifre di 500 € a la cooperative “Dinsi une man”.

Ai 30 di Jugn e je stade fate la cerimonie di premiazion dai partecipants.

La nestre aministrazion e riten che cheste iniziative e sedi strategjiche a pro da la zoventût, dal sport e da la solidarietât e le riten propedeutiche al rispiet des regulis sociâls di chês altris personis, in mût particolâr al rispiet da la diversitât di ducj i gjenars.