Inaugurazion Lavagnis Interativis Multimediâls

 

Sabide ai 13 di Otubar aes 11 ta la palestre des scuelis mediis di Gonârs e je stade fate la cerimonie indulà che a Aministrazion comunâl e à consegnât lis lavagnis interativis multimediâls a dutis lis classis des scuelis mediis.

A jerin presints l’Assessôr regjonâl Molinaro, il President CRUP De Agostini, il Sindic di Gonârs Del Frate, il Sindic di Bicinins Strizzolo, che al à lis scuelis che a fasin part dal Istitût comprensîf.

Denant dal grup dai insegnants, dai arlêfs des mediis e des classis cuintis elementârs e a un centenâr di gjenitôrs e ai rapresentants dal associazionisim di Gonârs il Preside prof. Della Negra al à ringraciât la aministrazion par la iniziative che e je stade sostignude e condividude dal grup dai insegnants, in ogni câs ancje chest impegnât in cheste gnove sfide di inzornament informatic.

Trê arlêfs des mediis a àn esponût lis lôr impressions daspò di un mês di insegnament multimediâl, dant un judizi assoludementri positîf.

Il Sindic Marino Del Frate al à visât che la iniziative e je stade condividude e volude di dute la Zonte cun chê di incentivâ la formazion digjitâl di docents e arlêfs e di dâ a ducj i fruts la stesse oportunitât tai confronts di cheste gnove tecnologjie.

Pe Crup il Conseîr Fornasiero Casimiro al à visât l’impen da la Fondazion viers i zovins sedi par la scuele sedi par la agregazion extrascolastiche, in particolâr sportive e culturâl.

L’Assessôr Molinaro al à visât l’impen da la Regjon par slargjâ il plui pussibil l’ûs des lavagnis interativis multimediâls e il stanziament di 1000.000 di euros par chel fin cu la disponibilitât tai mês a vignî.

Po i gjenitôrs a son lâts tes aulis dulà che i insegnants i àn ilustrât dal vîf l’ûs des lavagnis.