Cerimonie di pose da la prime piere - Centri diurni par anzians "Aree Gandin"

 

A la presince dal President da la Regjon autonome Friûl Vignesie Julie Renzo Tondo, dai Conseîrs regjonâi Colautti, Cagnelutti e Blasoni e dal Assessôr provinciâl Piuzzi, il Sindic di Gonârs, Marino Del Frate, al à metût la prime piere dal Centri diurni e residenziâl par anzians.

La opare e vignarà sù ta la zone nomenade “Gandin”, daûr dal Municipi, tal centri dal paîs.

Propit cun chest argoment al è scomençât il discors dal Sindic che al à visât in ce maniere che la posizion une vore centrâl da la costruzion, e je stade pensade par favorî la integrazion massime tra il tiessût sociâl dal paîs e i siei ospits.

Il centri che al è stât volût dut al plan tiere par favorî la massime acessibilitât par chei che lu frecuentaran al à impegnât fonts dal Comun par cuasi la metât dal impuart che al è cirche di 1.400.000 euros.

Chest al dimostre trop che la Aministrazion comunâl e desideràs il centri, al pont che tai prins agns dal mandât cuasi dutis lis risorsis comunâls a disposizion a son stadis dopradis pal so finanziament e pal ampliament des scuelis elementârs preferintju a altris intervents che a coventavin istès.

Il centri al sarà frecuentât di personis autosuficientis o cuntune piçule riduzion da la autosuficience, che a cjataran compagnie, animazion, refezion e chinesiterapie minimâl di grup, organizadis tes oris diurnis par tornâ di sere ai lôr leams di afiet da la lôr abitazion.

Al darà acet a la sede dal infermîr di comunitât e dal assistent sociâl, un ambulatori miedi e la sede des associazions di caratar sociâl che si ocupin di personis anzianis (MUNUS, Salotto punto d’incontro), sot di une gjestion volontaristiche e solidarie ma cu la presince di figuris professionâls di rilêf.

Sîs cjamaris cun doi jets a son previodudis par ospits temporanis, che a podaran doprâlis par cualchi setemane tal câs di indisponibilitât da la lôr abitazion par causis logjistichis o sociâls.

Al plan superiôr al sarà realizât un Auditorium di 160 puescj e la biblioteche.

Il tet al varà un implant fotovoltaic che al sigurarà la autosuficience energjetiche.

La grande sfide - al à concludût il Sindic - e sarà che di une gjestion economichementri compatibile, sfide dificile ma Gonârs al à une comunitât solidarie e gjenerose che par sigûr e darà il so jutori.

In fin il Sindic al à rimarcât che il centri pai anzians e l’ampliament des scuelis elementârs a son stâts finanziâts adun cu la riduzion dal debit dal Comun di 1.400.000 euro.

Il president Tondo, ringraciant il Comun par la iniziative che e viôt i anzians sistemâts tal mieç dal paîs e gjestîts in maniere solidarie, si è fermât su la cuistion dal lavôr fasint la liste di cualchi realtât di aziendis furlanis che di recent si son stabilidis tal nestri teritori, formadis di zovins che no varessin sielzût il Friûl se no fossin stâts i imprescj da la specialitât regjonâl a favorîlis.

L’Assessôr Piuzzi al à ringraciât la Aministrazion comunâl par la sensibilitât te gjestion des cuistions sociâls a Gonârs e al à dât at dal impen da la Regjon tal favorî lis oparis publichis par miorâ lis cualitâts di vite dai furlans.