Giovanni Battista Marzuttini

Tite Grison

 

Giovanni Battista Marzuttini al è tra i personaçs plui impuartants e interessants che il Comun di Gonârs al vedi mai vût. Musicist, fotograf, inzegnîr, pitôr e poete, in gracie des sôs tantis passions e al so jessi, savi ma pacific, al à savût concuistâsi la fiducie e l’afiet dai siei paisans e no dome, stant che in dì di vuê ancje la orchestre a pletri di Udin e puarte il so non.

Il panel memoreatîf, metût te jentrade de scuele secondarie di prin grât “Giovanni Battista Marzuttini” e screât ai 25 di Setembar dal 2021, in gracie di un finanziament de ARLeF - Agjenzie Regjonâl pe Lenghe Furlanis, in ocasion de Fieste de Patrie dal Friûl, al jentre intun percors che di agnorums la aministrazion comunâl e puarte indenant, par ricuardâ e valorizâ "Tite Grison", cemût che si firmave intes poesiis e intes vilotis.

Des publicazions, ai concierts, aes mostris fotografichis, fatis in colaborazion cu lis diviersis associazions dal puest, la sô figure e je sintude ancjemò vuê, soredut a Favuîs, indulà che la presince si pues cuasi tocjâ, daspò che intal 2013 e je stade metude une statue dongje di chê che e jere la sô cjase e ricet passade la prime vuere mondiâl.

Cumò, midiant di chest panel biografic, la sô presince si fasarà ancjemò plui fuarte ancje ta chê seconde cjase che il Comun di Gonârs al à volût dedicâi, lant a interessâ in maniere direte i arlêfs e lis arlevis de scuele che e puarte il so non, intun passaç simbolic di testemoni aes gnovis gjenerazions, di mût che la sô testemoneance e puedi stiçâ la fantasie e il pinsîr dai nestris fantats. E magari, parcè di no, par che intun doman no masse lontan un gnûf Tita Marzuttini al podedi lâ ator pes stradis dal nestri Friûl. 


I tescj dal panel a son par cure dal personâl de Biblioteche Civiche "Daniele Di Bert" e dal Sportel associât pe lenghe furlane dai Comuns di Cjarlins, Gonârs, Muçane, Porpêt, Prissinins e Sant Zorç di Noiâr e si fondin su lis publicazions buridis fûr intai agns di bande dal Comun di Gonârs.